Kontrobersiyal makaron ro sangka vlogger sa Japan matapos raya nga magkaon it man-o-war jellyfish ukon boroe, ro sambilog sa pinakamakamandag nga marine organism sa kalibutan!
Ginabatikos makaron ro sikat nga Youtuber sa Japan nga si “homosapi” bangud sa pagiging iresponsable kara sa pag-eaha ag pagkaon it Portuguese man-o-war para eamang makahimo it content ag mag abu ro views online.
Ro man-o-war hay kaeabanan nga ginatawag bilang jellyfish bangud sa itsura kara apang sa matuod raya hay sangka marine hydrozoan.
Kilaea ro man-o-war sa mabaskog kara nga kamandag nga makasarang nga pumatay it ibang sapat pati it tawo.
Sa viral video, makita nga gina explain ni “homosapi” nga gusto nana nga makasamit it man-o-war bangud nga nabalitaan nana nga manami ro anang sabaw kon ginapabukaean.
Kaibahan ro anang amigo, nag agto sanda sa sangka beach kun sa siin kilaeang gina-anod sa bibi it dagat kara ro mga man-o-war.
Matapos makadakop it pilang dosena kara, ginhugasan nanda raya it mayad ag ginpabukaean sa kaldero.
Naging matsa gulaman ro mga man-o-war kat raya hay matunaw sa pilang minuto nga pagpabukae.
Agud nga maging malasa gindugangan nanda raya it tinuea, soysauce ag betsin.
Nanamian si “homosapi” sa anang gin-eaha ag ginkumpara nana ro lasa kara sa scallops.
Nakalista it 3.5 million views ro video sa sueod eamang it siyam nga adlaw matapos i-upload sa Youtube.
Bangud sa minilyon nga views kara, maabu nga marine life experts ro nagkabaeaka ag nagtau it paandam sa publiko nga indi dapat tuearan si “homosapi”.
Suno sa mga raya, posibleng mabo-oe ro hilo sa mga man-o-war kon eaha-on it mayad apang kon kueang sa init ag oras ro pagpabukae, posibleng mamatay ro magkaon kara.
Delikado man nga mahanggop ro hilo it man-o-war halin sa steam it kaldero samtang raya hay ginapabukaean.
Posibleng maging rason raya it allergy ag kabudlay sa pagginhawa.
Sa makaron, owa it naging maeain nga epekto sa eawas nga naexperiensiyahan si “homosapi” ag ro anang mga amigo nga kaibahan nana nga nagkaon it jellyfish.