Nagpahayag it suporta si “Ka Leody” De Guzman, national president it Partido Lakas ng Masa (PLM) sa pahayag it Korte Suprema nga dapat ipagbawae ro pag-criminalize it cyberlibel.
Suno kana, ro cyberlibel hay masyadong “anti-mahirap”, anti-kritiko it gobyerno, ag nagatao it proteksyon sa mga opisyal nga nagahimo it anomaliya sa nasyon.
Makabig sigon raya nga unconstitutional bangud nga base sa konstitusyon, indi pwede nga punggan ro kinamatarong it kada pumueuyong Pilipino nga mag-angkon it freedom of expression.
Dugang pa nana, nagakadapat nga mag-angkon ro pumueuyo it kinamatarong nga batikuson ag kondenahon ro mga opisyal it gobyerno nga manakaw, kriminal, ag uwa it nahimo nga tikang para masolusyunan ro krisis it nasyon.
Samtang, nagapati man sigon imaw nga indi magdaea-eagan ro mga nakapungko makaron sa gobyerno kun ro sweldo eamang nanda ro andang saligan.
Maabong laye sa Pilipinas nga nakapokus eamang sigon sa kaugalingon nga interes it pulitiko nga nagiging rason it pagkalisod it pumueuyong Pilipino.
Paathag dugang ni “Ka Leody” kaya naging pigado ro nasyong Pilipinas bangud sa pag-angkon it politiko nga halin sa dinastiya. Bangud kara, konektado eagi ro mga raya sa mga mabahoe nga kumpanya kun sa siin, pabor man ro mga laye nga ginahimo it gobyerno kanda.
