Igabulgar it mga rekord sa banko ag buwis it mag asawang VP Sara Duterte ag Atty. Mans Carpio ro kaabuon it manggad nanda nga natipon umpisa pa ko 2007, suno kay Kabataan Party-list Rep. Renee Co, sambilog sa mga tagapaghambae it House Prosecution Team.
Ro nasambit nga mga records hay nauna eon nga ginpa-subpoena ag ginturn-over sa impeachment court.
Mag-eowas sa mga dokumento sa banko ag buwis it Bise Presidente ag ko anang asawa, gin-subpoena man it impeachment court ro record it Anti-Money Laundering Council (AMLC) angot sa mga transaksyong pinansyal it mag-asawa, nga nagasakop man umpisa kat imaw hay maging bise alkalde.
Nauna eon nga ginpahayag it House Committee on Justice sa mga pagpamati kara sa impeachment nga umabot sa P6.7 bilyon ro kabilugan nga kantidad it mga “covered” ag “suspicious” nga transaksyon it mag-asawang Duterte-Carpio nga na-flag it mga banko.
Ginapakita man sa andang SALN nga ro net worth it Bise Presidente hay nagsaka halin sa P7.5 milyon ko 2007 paagto sa masobra sa P88 milyon ko 2024
Ginpahayag ni Rep. Terry Ridon it Bicol Saro party-list, nga gusto nga masayuran it prosekusyon kun magakasinanto ro report it AMLC ag mga rekord sa banko sa mga SALN ag ITR it mag asawa.
