Matawhay sa kabilugan ro Kaean’an sa Kalye Food Festival nga gin’organisa it Local Government Unit it Kalibo.
Raya ro naging pahayag ni Sangguniang Bayan Member Ronald Marte kun siin nga raya hay ginhiwat halin June 20-22.
Nagperform ro pipila sa mga local bands ag pipilang mga celebrities sa nasambitan nga aktibidad nga may kaangtanan sa selebrasyon it Kapistahan ni San Juan de Bautista.
Nakasentro sigon ro katuyuan kara sa pagtao it kahigayunan sa mga negosyante nga kumita, pati man sa banwa ag pagdumdom sa kapistahan.
Angot kara, hinduna nga gabei sa Pook Jetty Port magahiwat sigon it sangka aktibidad sa pagpanguna ni Mayor Juris Sucro nga maging bisita ro sikat nga singer-rapper nga si Flow G kaeakip ro mga paraffle halin sa alkalde.
Samtang, sa adlaw it kapistahan June 24, may mga pahampang man nga himuon sa nasambitan man nga lugar kapareho it boxing ag skim boarding.
Padumdom ni Marte nga indi magdaea it ilimnon nga nakabote, bantayan ro kada isaea eabi eun ro mga inunga.
Sa pihak nga parte, bilang chairman for committee on disaster preparedness ginasiguro nanda nga may bastante nga mga kagamitan ro Municipal Disaster Risk Reduction and Management Council kontra sa mga kalamidad nga mahimo magtuhaw may kaangtanan sa anibersaryo it Bagyong Frank ku Hunyo 21.
