KALIBO, Aklan— Ginpahauman it husto it Kalibo Cathedral ro unang dominggo it pagpatigayon it misa matapos nga ginpaidaeom sa modified general community quarantine ro Aklan kon sa siin ginpasugtan ro pagpatigayon it misa nga una ro presensya it mga tumueo-o.
Suno kay Rev. Fr. Tudd Belandres, kora paroko it St. Jhon the Baptist Cathedral, eubus ro andang kalipay nga ginpasugtan it gobyerno ro panawagan it tanan bangud nga makabig man nga essential ro pagsimba adlaw-adlaw eabi eon kon adlaw it dominggo partikular makaron nga nagapangatubang sa krisis ro bilog nga kalibutan.
Kaangot kara, uwa sigon it mga kanta ro kada misa nga naga-umpisa it alas-6:00 it agahon, alas-7:00, alas-9:00, alas-10:00 ag alas-12:00 it truadlaw kamana man alas-4:00 it hapon hasta it alas-7:00 it gabie.
Raya hay agud nga taw-an it kahigayunan ro disinfection nga igapatigayon antes ag pagkatapos it misa.
Ginpasiguro ni Fr. Belandres nga nagasunod ro simbahan sa protocols ag guidelines nga ginapatuman it gobyerno kon sa siin makit-an ro mga markings sa sueod ag guwa it simbahan agud nga masunod ro social distancing kamana man ginapatuman ro one entry, one exit policy agud nga inde magsub-eang ro mga nagaguwa ag nagasueod sa simbahan.
Bangud kara, gin-imbitahan ni Fr. Belandres ro mga tumueo-o nga magsimba makaron nga adlaw it dominggo ag inde sigon magkalipat nga ipangamuyo nga maeowas ro tanan sa Covid-19.
