KALIBO, Aklan–Naghinyu ro Kalibo Elementary School sa Department of Education (DepEd)-Aklan it extension antes ro andang pormal nga pagpatigayun it full implementation it face-to-face classes.
Suno kay Abe Joy Isaran, Principal II it Kalibo Elementary School nga kinahang-ean nanda it bastante nga tyempo para limpyuhan ro andang mga classroom matapos nga masudlan it eutay tuga it pagbaha.
Naghinyu sigon sanda sa taeatapan nga modular learning anay ro andang igapatuman umpisa makaron nga adlaw hasta sa masunod nga dominggo.
Gin-insister man kara nga bukon pa it euwas para sa mga unga nga magbalik sa eskwelahan bangud owa pa eubusang nalimpyuhan ro mga edipisyo.
Kaabuan sigon sa andang mga libro ag story book hay nakaangkon it kasamaran matapos nga maabot it tubi-baha.
Nagpangayo man raya it pagpasaylo sa mga estudyante ag ginikanan matapos nga makaangkon it delay sa andang uman nga pagbalik sa eskwelahan.
