KALIBO, Aklan—Indi magapatuman it ‘No Movement Sunday’ ro banwa it Kalibo.
Suno kay Mayor Emerson Lachica nga bilang sentro nga banwa hay owa imaw naila nga maapektuhan ro ekonomiya bangud nga owa it magiging kita ro mga tricycle drivers, mga vendors ag iba pa.
Para kana, epektibo ro paglimita sa pagpasueod it mga pumueuyu, kun sa siin kada adlaw hay 15 eamang nga travel pass ro ginabaton kada banwa.
Dugang pa ni Mayor Lachica nga ginapatuman ro ‘No Movement Sunday’ agud nga ipaabot sa mga pumueuyu nga bukon pa it normal ro sitwasyon tuga it COVID-19 pandemic.
Uman nga nagpanawagan ro alkalde it kooperasyon ag sundon ro mga minimum health protocols eabi pa ag nasayuran eon it tanan ro peligro nga daea it nasambit nga deadly virus.
Nagapabilin ro aklan sa Modified Enhanced Community Quarantine hasta sa Agosto 15.
Pila sa mga banwa nga nagpatuman eon it ‘No Movement Sunday’ hay ro Banga, Malinao, Ibajay ag Tangalan.
