KALIBO, Aklan—Kapin sa 90 porsyento eon nga haom ro Kalibo Municipal Police Station sa pagsikyar it kaeowasan ag seguridad it mga deboto, bisita ag turista sa paaeabuton nga kapyestahan ni Sr. Sto. Niño de Kalibo.
Suno kay P/Maj. Frensy Andrade, hepe it Kalibo PNP Station nga nag-umpisa ro andang prepasyon halin pa ko buean it Oktobre it nagtaliwan nga dag-on kaibahan sa pagplano ro Aklan Police Provincial Office, lokal nga gobyerno it Kalibo ag iba pang force multipliers.
Ginpahayag dugang nga maga-umpisa ro deployment it mga kapulisan maghalin sa Aklan PPO sa Enero 11 samtang magaabot ro augmentation it police force sa Enero 14.
Masobra sa 2,000 ka mga uniformed PNP personnel ro ginaeauman nga magabantay sa week-long celebration it Kalibo Sto. Niño Ati-Atihan Festival 2025.
Suno pa kay P/Maj. Andrade nga kada dag-on eon raya ginahimo ag uwa haeos nagabag-o ro andang ginaplastar nga deployment it mga kapulisan sa mga ginakabig nga strategic areas kundi mas pang ginapabaskog ag ginadugangan eang raya kada okasyon.
Handom nanda nga maabot ro zero crime rate sa kabilugan it selebarasyon.
