KALIBO, Aklan—Aminado si market supervisor Abel Policarpio nga mabahoe ro naging epekto it Covid-19 pandemic sa kabilugan nga operasyon it Kalibo public market.
Raya hay matapos nga ginpaidaeom sa enhanced community quarantine ro probinsya it Aklan hasta nga ginbutang eon raya sa modified general community quarantine.
Suno kana, nagapabilin nga limitado ro operasyon it tindahan maghalin sa alas-5:00 it agahon hasta it alas-5:00 it hapon.
Mas naghaeoga man sigon sa makaron ro ginapatuman nga protocols kon sa siin uwa eon ginausuyan it quarantine pass ag identification card ro mga nagasueod sa tindahan.
Apang, nagapabilin ro striktong pagpatuman it health protocols kaparehas it paghugas it alima, pagtapak sa foot bath, pagbueo it body temperature, pag-obserba it physical distancing ag ro mandatory nga pagsuksok it face mask.
Sa pihak kara, gin-engganyo ni Policapio ro mga stall holders nga okupahan eon ro mga temporaryong stall nga ginpatindog it lokal nga gobyerno it gobyerno agud nga amat-amat nga makabawi ro public market.
Sa makaron sigon haeos tanan nga negosyo sa tindahan hay nagbukas eon apang mahina gihapon ro bentahan bangud nga ginaprayoridad it mga pumueoyo makaron nga panyempo ro mga nagapangunang kinahang-eanon sa pang-adlaw-adlaw partikular ro pagkaon.
