KALIBO, Aklan—Padayon nga igaduso ag maid-id nga pagatun-an ni Kalibo sangguniang bayan member Ronald Marte ro anang ginbaeay nga resolusyon angot sa pagbawae sa pagsuksok it helmet sa bisinidad it Poblacion, Kalibo.
Suno kana, manami kon matun-an it mayad ro anang resolusyon bangud nga makabulig raya nga makasabat sa mga unsolved cases it riding in tandem nga natabo sa mga kaeapit nga banwa.
May posibilidad suno kana nga ro mga uwa nakilan-i nga suspek hay nakaagi sa banwa it Kalibo ag nahagip it mga naka-installed nga cctv cameras.
Apang, bangud sa nakasuksok ro mga raya it fullface helmet hay indi gihapon sanda makilaea.
Mag-eowas kara, mga nakasuksok ro mga raya it bonet ukon facemask nga siguradong makatago sa andang identity.
Positibo ro konsehal nga may magapabor nga ahensya sa anang ginaduso nga resolusyon ukon may irekomenda nga panibag-o bangud sa ginaeauman nga maga-contradict raya sa national law bangud sa mandatory nga pasgsuksok it mga motorista it helmet.
Nasayuran nga bukon eamang it raya ro unang kahigayunan nga may nagduso nga ibawae ro pagsuksok it helmet it mga motorista kon nagaagi sa Poblacion, Kalibo bangud nga kato pa man hay may mga uwa eon nasolbar nga kaso it riding in tandem.
