KALIBO, Aklan–Ginsuportahan ni Kalibo sangguniang bayan member Augosto Tolentino pinaagi sa sangka proposed resolusyon ro hagna nga ginaduso ni Senator Robinhood Padilla angot sa pagbutang bilang regular employees ro mga nakaserbisyo eon it kapin sa limang dag-on pataas nga mga empleyado sa nagkaeain-eain nga ahensya it gobyerno.
Suno kay Tolentino, suportado nana ro hagna it senador para maangkon man it mga casual ag contractual employees ro nagakadapat nga benepisyo engkaso nga maging regular employee ro mga raya ag otomatiko nga makabueo it civil service eligibility.
Apang, posibleng una eamang sanda sa first level.
Nag-ugat ro hagna it nasambit nga senador bangud nga mataeopangdan nga mabahoe nga porsyento it mga empleyado maghalin sa lokal hasta sa national government agencies hay mga contractual kon siin bukon sanda it kaibahan sa mga benepisyo nga ginabaton it mga regular employees.
Kaeabanan pa sa mga raya hay dinag-on eon ro pagtrabaho sa gobyerno apang nagapabilin sa gihapon nga casual hasta nga maabutan it retirement age bangud sa kawad-an it civil service eligibility.
