KALIBO, Aklan—Nagapabilin nga eowas ag malimpyo ro tubi sa kaeawran it isla it Boracay para pagligsan ag para sa iba pang aktibidad.
Raya base sa ginpaguwa nga pahayag it Environmental Management Bureau (EMB) Region 6 nga nagapalig-on sigon sa kumpyansa it lokal ag internasyonal nga mga turista.
Suno kay Director Ramar Niel Pascua, halin kat temporaryong ginsarado ro Boracay ko 2018, maid-id nga ginmonitor it Environmental Management Bureau Region 6 ro kalidad it tubi sa baybayon it isla.
Sa ulihing pag-eksamin ko Hunyo 2024, ginpakita nga ro lebel it fecal coliform sa Boracay hay una sa sueod it eowas nga basehan para sa recreational waters.
Kapin sa 24 monitoring stations may una ro Environmental Management Bureau Region-6 sa baybayon it Boracay agud masiguro ro komprehensibong pagsubaybay sa lugar.
Suno pa kay Pascua, ro pagbuoe it mga sample it tubi hay ginahimo kada buea eabi eon sa mga lugar nga masaming ginaadtunan kaparehas it front beach, Diniwid beach, ag Bulabog beach.
Mag-eowas sa water quality monitoring, hugot man nga ginasubaybayan it Environmental Management Bureau Region-6 ro pagsunod it mga lokal nga negosyo sa mga laye pangkapaligiran, kaibahan ro solid waste management.
