Hugut nga ginpamalibaran it kampo ni Sen. Ronald “Bato” dela Rosa ro pahayag it National Bureau of Investigation (NBI) nga imaw hay “armed and dangerous” samtang nagapadayun ro operasyon it mga awtoridad angot sa napabalitang arrest warrant halin sa International Criminal Court (ICC).
Sa sangka pahayag, ginpaabot it legal counsel ni Dela Rosa nga si Atty. Jimmy Bondoc nga owa it kamatuoran ro nasambit nga description sa senador.
Suno kay Bondoc, ro NBI sigon ro “armed and dangerous” bangud nga armado ro mga tawuhan kara nga nagpatigayon it operasyon para ipatuman ro warrant nga owa pa sigon ginpakita sa kampo it senador ag owa nag-agi sa lokal nga korte.
Nauna eon nga ginpahayag ni NBI Director Melvin Matibag nga standard protocol eamang it ahensya nga ginakabig nga “armed and dangerous” ro tanan nga subject it operasyon ukon mga indibidwal nga ginaserbihan it warrant bilang kaparte it andang security precautions.
Ginpaathag ni Matibag nga pirmeng nagapahaum ro mga operatiba sa posibilidad nga armado ro andang target agud nga masiguro ro kaeowasan it mga tawuhan sa operasyon.
Samtang, padayun nga ginakuwestiyon it kampo ni Dela Rosa ro legalidad it gina-alegar nga warrant halin sa ICC, eabi eon ro ginasugid nga kawad-an kara it proseso sa idaeum it lokal nga hudikatura it nasyon.
Si Dela Rosa hay kaibahan sa mga personalidad nga gina-imbestigahan it ICC angot sa war on drugs it administrasyon ni dating Pangueong Rodrigo Duterte.
