KALIBO, Aklan—Ginkumpirma it Commission on Elections (COMELEC) nga naka-rehistro sanda it kapin sa 180,000 nga mga bag-o nga botante sa bilog nga Western Visayas bilang kaparte it preparasyon para sa May 9, 2025 midterm elections.
Base sa pinakabag-o nga data nga ginpaguwa it COMELEC as of May 28, naga-abot eon sa 179,293 ro kabilugan nga numero nga naproseso kun sa siin masobra 88,000 kara hay eaeaki ag haeos 91,000 ro mga babaye nga nag-apply para sa voter’s registration.
Pinakamaabu sa mga new voters hay naghalin sa Negros Occidental nga may masobra 43,000 nga mga eaeaki, ag haeos 45,000 nga mga babaye.
Sa Aklan hay nakalista man it 6,904 nga eaeaki ag 6,622 nga babayeng nagparehistro.
Ginpahayag ni Comelec-6 director Atty. Dennis Ausan nga nagapadayon man ro andang pagproseso it voter’s deactivation para sa mga owa nakaboto sa sueod it daywang magkasunod nga eleksyon.
Ginpaathag ni Ausan, nagakinahangean pa ro deactivation process it approval halin sa Election Registration Board (ERB) ag paga-impormahan ro apektado nga mga botante pinaagi sa sangka sueat.
Suno sa opisyal, pwede gihapon nga magpa-reactivate it andang rehistro ro mga deactivated voters pinaagi sa pagbisita sa opisina it election officers sa andang natungdan nga siyudad ukon banwa.
Tuyo it registration drive nga masiguro nga makaboto ro tanan nga eligible voters sa nagahilapit nga eleksyon.
