Ginatantya nga kapin sa P15,000 pesos ro danyos it nag-eontad nga sunog sa Sitio Malogo, Brgy. Poblacion, New Washington bandang alas-8:55 it agahon, adlaw it Biyernes.
Suno kay FO2 Jonathan Siñel, arson investigator it BFP New Washington, ro baeay hay ginapanag-iyahan ni Ariel Santiago, 60-anyos kon sa siin uwa imaw sa anang panimaeay kat nasunog raya.
Sa andang pag-imbestiga sa biktima, nagguwa sigon raya it makadali agud nga magpanueaon it tangkong ag aminado imaw nga may gin-aywanan nga ginaeaha sa anang dapog.
Ulihi eon sigon nataeopangdan nga nagadaba-daba eon ro anang dapog nga himu sa light materials nga tumapik ro kaeayo sa anang ibang parte it baeay nga human sa mix materials.
Sa pagresponde it BFP hay mabahoe eon ro kaeayo ag naapula raya bandang alas-9:15 it agahon. Ro insidente hay padayon pang ginaimbestigan.
Samtang, nagpadumdom si FO2 Siñel sa publiko nga magdahan sa kaeayo bangud nga sa makadaling oras nga makalipatan raya hay posibleng mauli sa sunog nga mag-ugdaw it mga propyedad.
