KALIBO, Aklan — Syento porsyento eon nga haum ro kapulisan sa Aklan sa pagsug-aeaw sa Bag-ong Dag-on.
Suno kay P/Capt. Aubrey Ayon, tagapaghambae it Aklan Police Provincial Office (APPO) nga naka-heightened alert ro andang pwersa sa bilog nga nasyon agud nga masiguro ro seguridad it publiko eabi eon ro mga biyahero.
Nakikipag-angot man sigon sanda sa mga ahensiya it gobyerno ag natungdan nga traffic management offices it kada banwa agud nga mabantayan ro hueag it mga tawo ag mga saeakyan .
Ginpabaskog man nanda ro police visibility sa mga lugar nga maabung tawo ag sa mga pampublikong lugar.
Dugang pa nga may gindeploy sanda nga mga kapulisan sa mga gin designate nga area it baealigyaan it paeupok.
Partikular man nga ginatutukan makaron it mga awtoridad hay ro mga boga ukon improvised cannon nga peligroso eabi eon sa mga unga.
Padumdum pa ni P/Capt Ayon nga magdahan sa pagmaneho para malikawan ro vehicular accident ag sa designated areas eamang magpaeupok it mga firecrackers.
Ro mga pagpahaum it PNP hay sa idaeum suno kana it Oplan Ligtas Paskuhan bilang pagpahaum sa selebrasyon it Paskwa ag Bag-ong Dag-on kun sa siin raya hay nag-umpisa ko Simbang Gabi ag magatapos sa Enero 6, 2025.
Samtang, kumpiyansa man ro APPO nga kapareho ko 2023 hay magiging generally peaceful ro yuletide season makaron nga dag-on.
