KALIBO, Aklan—Naglobo eon sa 176 ro nailistang kaso it dengue halin ko Enero 1 hasta it Pebrero 3 it presenteng dag-on sa bilog nga probinsya it Aklan.
Sa interview it Bombo Radyo kay Roger Debuque, Sanitation Inspector IV it Provincial Health Office (PHO) Aklan, ginpahayag kara nga nagaabot sa 109 percent ro nailistang kaso halin sa 84 nga numero sa kaparehong tyempo ko 2018.
Dugang pa kara nga ro banwa it Kalibo gihapon ro nagapangunang may pinakamaabong dengue cases nga nagaabot sa 60; Banga nga may 18; ag Malay nga may 14 cases.
Kaeabanan sigon sa mga natamaan it sakit hay mga ongang may edad sang dag-on hasta napueong dag-on.
Base sa andang datos, nagaabot sa pitong katawo ro namatay bangud sa dengue halin ko 2017 hasta it 2018.
Samtang, ginpadumdom man it PHO ro mga pumueoyo nga ipabiling malimpyo ro palibot partikular eon ro mga kanae nga may stagnant water nga mahimong pamugaran it mga eamok.
