KALIBO, Aklan—Uman nga nadugangan ro kaso it 2019 coronavirus disease ukon COVID-19 sa probinsya it Aklan.
Base sa ginpaguwa nga statement it Provincial Health Office, ro pang limang nagpositibo sa COVID-19 hay ro 66-anyos nga babaye nga halin sa banwa it Kalibo ag asawa it ikatlong nailistang kaso sa Aklan.
Ro pasyente hay may travel history sa Manila kaibahan ro anang asawa nga lay minister ko March 6, 2020.
Ginpahayag dugang nga imaw hay nakaangkon it mild cough apang uwa it natabo nga consultation.
Ko March 16, 2020 eamang sigon imaw nagpakonsulta ag gintaw-an it anti-microbial nga bueong sa sueod it pitong adlaw.
Base pa sa statement it PHO, nagmayad ro pasyente sa medication nga gintao it doktor ag nagpaidaeom sa strict home quarantine.
Ko March 29, 2020 hay ginboe-an imaw it specimen sample ag ginpadaea sa Western Visayas Medical Center for confirmatory test hasta nga kahapon, Abril 1, 2020 hay nagguwa ro resulta nga positibo raya sa SARS-CoV-2 nga nagadaea it sakit nga COVID-19.
Sa makaron hay lima eon ro nailistang kaso it COVID-19 sa Aklan kon sa siin nagapabilin pa ro bilog nga probinsya sa enhanced community quarantine.
