Kalibo Aklan —– Ap-at nga kaso it coronavirus disease (COVID-19) ro nadugang sa Western Visayas.
Raya ro ginkumpirma ni Dr. Jane Juanico, Head it Department of Health (DOH) Region 6.
Bangud kara, nagsaka eon sa 22 ro kabilugan nga numero it mga tinamaan it sakit sa Region 6, kun sa siin, daywa kara hay namatay eon.
Suno kay Dr. Juanico, kaibahan sa nadugang sa listahan ro daywang taga-Capiz nga ginaeakipan it sangka 53 anyos nga eaeaki halin sa Capiz nga may travel history sa Manila ag sa estable eon nga kundisyon ag sangka 60 anyos nga babaye nga may travel history sa Dubai ag Manila ag namatay ko Sabado nga adlaw.
Sangka 44 anyos nga eaeaki man halin sa Aklan ro sambilog sa mga pasyente nga may travel history sa Manila ag nagatrabaho sa sangka ahensiya it gobyerno nga naka-assign sa Capiz .
Nagapabilin man raya nga sa stable condition samtang ro sambilog pang pasyente hay sangka 58 anyos nga eaeaki halin sa probinsiya it Iloilo nga namatay ko martes nga adlaw .
Ro andang confirmatory resulta hay nagguwa ko martes halin sa Western Visayas Medical Center (WVMC).
Nagapadayun suno kana ro andang contact tracing sa mga posibleng naka-ibahan it mga nagpositibo sa COVID-19.
Angot kara, ginlaygayan ni Dr Juanico ro mga pumueuyu nga magpabilin anay sa sueod it andang mga baeay bangud nga indi pa matumod sa makaron kon sin-o ro posibleng infected it virus.
