KALIBO, Aklan — Mas kapin pang lomobo sa 4,679 ro mga nailistang nagkasakit it dengue sa probinsya it Aklan.
Raya hay base sa pinakaulihing datos it Aklan Provincial Epidemiology Surveillance and Response Unit it Provincial Health Office (PHO) halin ko Enero 1 hasta it Agosto 24, 2019 nga may 19 eon nga namatay.
Suno kay Dr. Cornelio Cuatchon it PHO-Aklan, kapin sa 339 porsyento ro gintaas kara kon ikumpara ko dag-on 2018.
Nagapanguna gihapon sigon sa listahan ro banwa it Kalibo nga may 947 kaso; ginasundan it Banga nga nakalista it 442 kaso; nagapangatlo ro New Washington nga may 422 kaso; nag pang ap-at ro Balete nga nakalista it 347 kaso ag Numancia nga may 334 kaso.
Pag-abot sa age bracket suno kana hay ro mga naga-edad it 11 hasta 20 anyos ro nakalista it maabong kaso nga umabot sa 1,578; ginasundan it naga-edad sang dag-on hasta it napueong dag-on nga nakarecord it 1,487 ag nagpangatlo ro naga-edad it 21 hasta it 30 anyos.
May kaangtanan kara, uman nga nagpadumdom si Dr. Cuatchon sa publiko nga ipabiling malimpyo ro palibot ag sundon ro panugyan it ahensya kaangot sa pagsunod sa 4’s strategy nga ginakaeakipan it pag-usoy sa mga ginatiniran ag posibleng pangitlugan it eamok; magsuksok it mga eambong nga komportable ag may mahaba nga butkon ukon pajama; tempranong magpakonsulta sa doctor kon may eagnat ukon iba pang baeatian; ag suportahan ro fogging sa inyong lugar.
