KALIBO, Aklan—Nagaabot eon sa kabilugan nga 22,741 ro kaso it dengue sa bilog nga Western Visayas.
Ro nasambit nga datos nga nailista it Department of Health region VI hay maghalin ko Enero 1 hasta it Setyembre 7 it presenteng dag-on.
Sa nasambit nga numero, 53 ka mga indibidwal ro namatay kon sa siin kapin sa 284 porsyento ro gintaas kara kon ikumpara sa kaparehong period ko nagtaliwan nga dag-on nga nagaabot eamang sa 5,926 nga kaso ag 25 ro binawian it hueam nga kinabuhi.
Sa nasambit nga kaso it dengue sa rehiyon, ro probinsya it Aklan hay nakalista it 2,238 nga kaso ag may 4 nga indibidwal nga namatay; sa Antique hay may 1,205 nga kaso ag 2 ro namatay; Capiz nga may 2,321 nga kaso ag may an-om nga namatay; Guimaras nga nakalista it 1,831 nga kaso ag sambilog ro namatay.
Samtang ro probinsya it Iloilo hay nakalista it 8,577 nga kaso ag 23 ro binawian it hueam nga kinabuhi; Iloilo City nga may 1,577 nga kaso ag 10 ro namatay ag sa Negros Occidental nakalista it 3,671 nga kaso ag 10 ro binawian it hueam nga kinabuhi kamana man sa Bacolod City nga may 1,321 nga kaso ag tatlo ro namatay.
Angot kara, uman nga ginpadumdom it ahensya sa publiko nga sundon ro 4S strategy kontra sa dengue nga ginakaeakipan it Search and destroy ro mga ginapamugaran it eamok, Self-protection measures, Seek early treatment, ag Say yes to fogging kon may outbreak.
