KALIBO, Aklan—Kapin sa 317 eon nga kaso it leptospirosis ro nailista sa bilog nga Western Visayas maghalin ko Enero 1 hasta it Setyembre 7 it presenteng dag-on.
Sa nasambit nga datos, 19 ka mga indibidwal ro binawian it hueam nga kinabuhi.
Suno sa Department of Health region VI, nagnaba it 56 porsyento ro nasambit nga kaso kon ikumpara sa kaparehong period ko nagtaliwan nga dag-on nga nakalista it 718 nga kaso ag 58 ro namatay.
Nasayuran nga ro leptospirosis hay mabuoe sa tubi ukon palibot nga kontaminado it ihi it sapat kaparehas it eanggam.
Masami raya nga nagasueod sa eawas it tawo pinaagi sa nina sa panit ukon mucous membranes sa mata, ilong, ukon bibig.
Sa ulihing datos nga ginpaguwa it ahensya, ro probinsya it Aklan hay nakalista it 13 nga kaso ag sambilog ro binawian it hueam nga kinabuhi.
Apang, sa bilog nga rehiyon, kaeabanan sa mga namatay hay mga mangunguma bangud sa andang pagtrabaho sa kontaminadong tubi.
Ginpadumdom man it ahensya ro publiko nga maglikaw sa baha ag magsuksok it proteksyon kaparehas it boots ag raincoat kapin eon kon may mga nina sa eawas.
