KALIBO, Aklan — Gin-atras it Libacao Police Station ro kasong robbery with homicide kontra sa tatlong ka indibidwal ag sangka owa pa makilaea nga persona bangud sa natabu nga paghold-up ag pagpatay sa sangka micro-lending collector ko Hulyo 26, 2019 sa Sitio Balisong, Brgy. Pampango, Libacao.
Ginkumpirma ni P/Capt. Willian Aguirre, hepe it Libacao PNP ro pagdihon it motion to withdraw of criminal complaint.
Suno sa motion, owa sigon it bastante nga basehan ag ebidensiya ro kapulisan agud nga kasuhan ro ap-at.
Natukiban nga nagpinuril ro unang testigo sa pagturo sa mga suspek nga pumatay sa biktimang si John Rey Madera, 24, residente it Brgy. Anabo, Lemery, Iloilo ag kolektor it ASA Philippine Foundation Micro Finance bangud sa paghingabot sa P50,000 nga padya nga gintaeana it lokal nga gobyerno it Libacao.
Matapos nga barilon, ginbo-oe it mga suspek ro knapsack it biktima nga may ginatantiya nga P10,000 nga cash, cellphone ag iba pang mga importanteng gamit kara.
Ginpahayag pa ni P/Capt. Aguirre nga uman sanda nga magapasaka it nagakaigo nga kaso sa Aklan Prosecutor’s Office base sa pahayag it mga matuod nga nakasaksi ag may kahilabtanan sa krimen.
Nasayuran nga matapos nga makonsensiya ag kahadlok sa anang kabuhi, nagdangop sa pulisya ro sambilog sa mga suspek ag ginkanta ro anang mga kaibahan sa krimen.
Kadungan sa pagbawi sa kaso hay ro pagpahilway sa mga unang gin-akusahan ag pagtugis sa mga matuod-tuod nga responsabli sa krimen nga nagapabilin nga at-large sa makaron.
