Ginpasakaan eon it kasong Murder sa Office of the Provincial Prosecutors ro suspect sa pagbaril-patay sa beteranong mamamahayag nga si Juan “Johnny” Dayang.
Nagapabilin sa gihapon nga at large ro suspect ukon uwa pa nadadakpan, apang may mga lead eon ro kapulisyahan.
Sa makaron suno kay PCpt. Aubrey Ayon, tagapaghambae it Aklan Police Provincial Office hay na refer eon ro nasambit nga kaso sa Prosecutor’s office kaya indi eon pwede sanda pwede katao pa it maeawig nga impormasyon may kaangtan sa kaso. Ginatuyo gid it kapulisyahan nga madakpan eon ro suspect.
Dugang pa ni PCpt. Ayon nga indi makabig nga election related ro pag-baril patay sa beteranong mamamahayag kaya mahambae sigon nga nairaos nga generally peaceful ro nagtaliwan nga eleksyon bangud nagpabilin ro probinsya it Aklan sa idaeom it green category.
Samtang,sa pihak nga bahin, nagpadumdum man imaw sa mga pumueuyo angot sa nagaeapta nga “benta slot” scam nga maging mapag-usisa, kun may mag tanyag it makarundayang investments hay mag conduct sigon it background checking kun lesinyado ukon rehistrado.
Magduda man sigon eagi kun medjo manami ro ginasumbil nga kabaylo kapareho it madali nga kita ag mabahoe ro kinterest, bangud bukon makaruyon kadali nga magbahoe ro kwarta. Ag mas mayad man suno kana nga mag report sa police station para ma-ieakip sa mga naimbestigahan agud mabuligan it kapulisan ro mga biktima nga makaangkon it hustisya.
