Hugot ro pagpadumdom makaron it kapulisan sa publiko nga maging mapagmatyag ag alerto eabi eon kon nagapamakae bangud sa posibilidad nga pagkalhit eon man it mga tikwian sa nagahilapit nga selebrasyon it Paskwa ag Bag-ong Dag-on.
Angot kara, ginpahayag ni PCpl. Leonelyn Artes, tagapaghambae it Aklan Police Provincial Office nga nagaprepar eon ro otoridad it andang security plan para uwa it mabiktima it mga mapamentahang tawo sa raya nga tyempo.
Magiging visible suno kana ro kapulisyahan sa mga strategic location partikular sa mga mall ag tindahan para malikawan ro mga nakakadismayang insidente.
Posible sigon nga boe-on eon man it mga tikwian ro kaparehas kara nga kahigayunan eabi eon sa mga dugsuan nga lugar para makapangbiktima.
Ginpahayag dugang ni PCpl. Artes nga maging responsable eamang ro tanan sa andang mga bitbit nga bag, kahita ukon anu pa man una eabi eon kon mga nagapamakae sa mga mall ag iba pang establisyimento.
Inde magpadaea-daea sa mga istorya eabi eon kon bukon manlang it kilaea ro nagapaeapit kanda.
