KALIBO, Aklan— Nagapanawagan sa makaron it katawhayan ro mga katutubong Ati sa isla it Boracay kasunod ko andang pagbaton it Certificate of Land Ownership Award (CLOA) nga ginta-o mismo ni Pangueong Rodrigo Duterte ko Nobyembre 8, 2018.
Raya hay sa pihak nga nakaangkon anay it tensiyon sa pilang eogta nga gintao kanda bangud may mga nagpakilaeang claimant ag nagsumite pa sigon it tax declaration.
Apang, ginklaro ni Department of Agrarian Reform (DAR) Secretary John Castriciones nga inde makabig nga pamatuod ro andang ginpakitang dokumento para mahambae nga sanda ro nagapanag-iya it nasambitang eogta.
Suno pa kay Castriciones, 7.9 hectares kunta ro eogtang igapanupod apang ro 2.3 hectares hay road right of way nga inde nanda pwedeng mai-distribute.
Samtang, ro nabilin nga 2 hectares hay may claimant nga kon sa siin hay ginkuraean pa raya ag ginbutangan it mga guwardiya apang gilayon man nga nabawi it gobyerno sa bulig it pulisya.
Sa makaron sigon hay ginaproseso eon ro dokumento it nasambitang eogta para maobrahan it CLOA para sa mga beneficiaries.
Sa pihak nga parte, nagpanupod it mga tools ag binhi ro ahensya ag igapaidaeom 44 Ati families sa training para mapuslan ag mapaumwad ro andang mga eogta.
Nasayuran nga sa diskurso ni Pangueong Rodrigo Duterte, gin-insister kara nga ro eogtang ginpanupod sa mga beneficiaries hay pamaagi it land reform bangud ro isla sigon hay sangka agricultural land.
