KALIBO, Aklan—Inde pagtaw-an it baeas sa bilog nga probinsya it Aklan ro contractor it road construction sa national highway nga sakop it Brgy. Dumga, Makato.
Raya sigon ro sabat it porman kay Punong Barangay Leovigildo Villanueva kat ginkwestyon it barangay council ro presenteng estado it karsada nga mabahoe nga perwisyo sa mga motorista, byahero ag maging sa mga pumueoyo.
Naputos sanda it reklamo bangud nga uwa nagahueag ro nasambit nga proyekto bangud sa kawad-an it baeas.
Angot kara, gin-imbitahan nanda ro Department of Public Works and Highways ukon DPWH Aklan sa andang igapatigayon nga barangay assembly sa adlaw it Sabado agud nga sanda ro direkta nga magasabat sa concern it mga pumueoyo.
Ginpahayag dugang ni Villanueva nga base ginapulitika sanda bangud nga ro karsada sa anang nasakupan ro unang ginguba nga hasta sa makaron hay uwa eon ginpadayon.
Nagaapela sanda sa natungdan nga mahimuan it pamaagi nga matapos ro road construction nga takaw-aksidente ag mabahoe eon ro perwisyo nga gintao sa mga umaeagi.
