Ginbaril ro self-confessed drug lord nga si Rolan ‘Kerwin’ Espinosa kahapon adlaw it Huwebes, Abril 10, 2025, samtang nagatalumpati sa anang pagpangampanya sa Barangay Tinag-an Albuera, Leyte.
Raya ro ginkumpirma ni Albuera Councilor aspirant Carl Kevin Batistis. Base sa impormasyong nakalap it Bombo Radyo Tacloban, nagtipon ro bilog nga slate ni Espinosa sa sangka covered court kaibahan ro mga residente it Barangay kat biglang matabo ro insidente.
Insigidang gindaea sa Ormoc Doctor Hospital si Espinosa pati eon man ro sangka menor de edad nga nadamay sa insidente.
Samtang, una sa Crime scene eon ro Albuera PNP ag presenteng nagapatigayon it imbestigasyon ag hot pursuit operation kontra sa mga salarin.
Sa pihak nga bahin, si Espinosa hay nagdesisyon nga dumaeagan bilang alkalde kontra kay incumbent Mayor Sixto Dela Victoria sa idaeom it partidong Bando Espinosa-Pundok Kausaban (BE-PK) party.
Nagtuhaw ro anang kandidatura matapos imaw nga mapahilway sa kat ginbasura it Regional Trial Court sa Baybay City ro kaso kontra kana bangud sa kakueangan it ebidensya.
Madumdumang si Kerwin Espinosa hay naging parte it kontrobersiya ku 2016 kat ikonekta imaw ni dating Pangueong Rodrigo Duterte sa ilegal nga kalakalan it droga sa Eastern Visayas.
Ginpasibangdan si Espinosa ag ro anang ama nga si Rolando Espinosa Sr., nga kato hay alkalde it Albuera, it pagiging imbolbado sa narcotics trade matapos ro sangka police raid kun siin nataeupangdan ro P11 million nga haega it shabu maeapit sa andang gina-istaran. Nag-surrender si Rolando Espinosa Sr., ku katung-anan it 2016 apang uwa nagbuahy hay napatay sa sueod it anang selda sa Baybay City Jail.
