KALIBO, Aklan—Ginpahayag ni Mr. Odon Bandiola, sangguniang panlalawigan (SP) Aklan consultant nga ginhimo eamang it mga lideres it probinsya ro nagakaigo nga tikang para mapaabot ro sintemyento it mga Aklanon sa hugot nga pagpamaeabag sa hagna nga Boracay Island Development Authority ukon BIDA Bill as a government-owned and controlled-corporation ukon GOCC.
Sa naging privilege speech sigon ni Aklan Governor Reynaldo Quimpo hay ginsaysay nana kon anu ro naging kaungdan it tanan nanda nga desisyon hasta nga umabot sa punto nga gindeklarang persona non grata sa Aklan ro Bicolano congressmen nga proponent it uman nga pagbuhi sa nasambit nga hagna.
Apang, gilayon man suno kana nga ginbawi raya it Sangguniang Panlalawigan officials kat makaabot kanda ro mensahe nga ginbawi eon it mga proponent ro andang proposisyon ag bilang baylo hay ginbawi man ro nasambit nga deklarasyon.
Ginpahayag dugang ni Bandiola nga sa pagdeklara man sa SP Aklan nga persona non grata hay medyo uwa eon it komento kara ro mga opisyal bangud nga sa kamatuoran hay kinamatarong man nanda nga magbaeos kon anu ro andang nahatun-an nga obrahon ag ro andang naging interpretasyon sa ginhimo it Aklan LGU’s.
