KALIBO, Aklan—Naging matumal ro kita it mga tricycle drivers nga nagabyahe maghalin sa Kalibo International Airport paadto it Kalibo ag iba pang lugar vice versa.
Suno kay Noel Lorenzo, secretary it Pook Tricycle Operators and Drivers Association nga raya hay bangud sa kawad-an it pasahero sa nasambit nga paeoparan.
Mabahoe ro naging epekto it kawad-an it mga flights bukon eamang it sa andang sektor kundi mgaing sa mga negosyo sa palibot it paeoparan.
Haeoson eon nga makatibawas ro mga negosyante bangud sa kueang nga mayad ro andang ginakita sa kada adlaw sa anda nga renta.
Rason nga sandang mga tricycle drivers maskin siin nagapahatod ro pasahero nga may eksaktong pamasahe hay anda eon lang raya nga ginahatod agud maskin papaano hay may igauli man ro mga raya nga maskin sangkiri nga kita sa andang pamilya.
Madumduman nga halin ko nagtaliwan nga pandemya hay naging maeanghay ro Kalibo International Airport kon sa siin maabong establisyimento ag negosyo sa palibot it paeoparan ro nagsarado.
Raya hay matapos nga uwa eon haeos it byahe it mga eroplano maging international ukon domestic flight sa nasambit nga paeoparan bangud sa direkta ro mga raya nga nagahugpa sa Caticlan Airport nga ginadumaea it San Miguel Corporation.
Madumduman dugang nga maabong negosyante ro nag-apela it bulig sa lokal nga gobyerno it Aklan nga maibalik ro kapagsik sa nasambit nga paeoparan bangud sa maabo ro nawad-an it pangabuhian.
