KALIBO, Aklan — Suspendido ro klase makaron nga adlaw it Biyernes, Setyembre 13 sa probinsiya it Aklan.
Sa ginpaguwa nga advisory ni Aklan Governor Joen Miraflores, owa it sueod sa elementary hasta high school sa bilog nga probinsiya bangud sa mabaskog nga buhos it uean.
May pilang eskwelahan nga nagsuspinde man it klase sa kolehiyo.
Nauna eon nga ginpaabot it state weather bureau nga apektado it Habagat nga ginpabaskog it Severe Tropical Storm Bebinca ro mabahoe nga parte it Pilipinas.
Pinaagi sa SMS ukon short messaging system, nagpaguwa it Orange Rainfall Warning ro National Disaster Risk Reduction and Management Council (NDRRMC) sa Aklan kaina it aga-aga.
Ginapadahan ro mga residente sa probinsiya kontra sa pagbuhos it grabeng pag-uean, pagbaha ag posibleng paghugos it eugta.
