KALIBO, Aklan— Gin-ako it treasurer’s office it gobyerno probinsyal it Aklan nga naging mabahoe ro epekto it Covid-19 pandemic sa andang koleksyon sa unang quarter it dag-on.
Suno kay Bernardino Villaruel, acting provincial treasurer nga naagaabot eamang sa P8.9 milyon pesos ro andang nakolekta sa general fund nga ginakaeakipan it real property tax, amusement tax ag iba pa sa buean it Abril.
Maeayo sigon ro deperensya kara kon ikumpara ko nagtaliwan nga dag-on it kaparehong buean nga umabot it P40 milyon pesos ro andang collection.
Samtang, pag-abot suno kana sa EEDD fund partikular sa andang koleksyon sa caticlan jetty port, nagaabot eamang raya sa P9 milyon pesos halin sa P40 milyon pesos ko nagtaliwan nga dag-on.
Sambilog sa mga rason kara hay ro enhanced community quarantine kon sa siin nagsarado ro mga negosyo ag inde kaguwa ro mga tawo para magbayad sa andang obligasyon.
Ginpaathag nga ro taxes ro life blood it nasyon apang bangud sa pandemya hay bumagsak ro ekonomiya kon sa siin sa Aklan hay eubus nga naapektuhan ro industriya it turismo.
Sa makaron suno kana hay amat-amat eon sanda nga nakakabawi halin kat ginpaidaeom sa modified general community ro bilog nga Aklan.
Maabo eon sigon ro nagapadueong sa andang opisina agud nga magsettle sa andang obligasyon.
Sa pihak kara, ginhinyo nana ro tanan nga pwede man sandang mag bayad online pinaagi sa andang ginprovide nga account.
