POLICE Report — Ginbawian it anang hueam nga kinabuhi samtang ginabueong sa ospital ro sangka stand-up comedian matapos nga barilon it makapilang beses sa anang uyahon it tatlong owa pa nakilaea nga suspek sa sueod it sangka beer house sa Angeles City sa Pampanga.
Owa eon nasalbar pa it mga doktor it Angeles University Foundation Medical Center ro biktimang si Gold Dagal, 38, tuga it tama it bala sa eawas ag uyahon.
Base sa report it Angeles City police, natabu ro krimen ko Sabado it gabi-i sa sueod it Pampanga’s Jest bar, sa nasambit nga siyudad.
Nagatuhaw sa paunang imbestigasyon it kapulisan nga naga-inom it beer ro biktima sa sueod it nasambit nga bar kat gulping nag-abot ro tatlong kaeaeakin-an.
Sambilog sa mga suspek ro nagbo-oe it baril ag ginbinaril ro biktima sa itsura ag iba pang parte it eawas ag dayun nga nagpaeagyo.
Insigida man nga gindaea sa ospital ro biktima apang makataliwan ro 9 nga oras hay namatay man raya.
Suno sa ina it biktima nga si Jocelyn Cruz, kataeaw ro ginhimo nga pagpatay it mga suspek sa anang unga.
Posible sigon nga sambilog sa mga suspek hay na-offend sa mga jokes it anang unga.
Kilaea si Dagal sa anang mga jokes, ag komentaryong may kaangtanan sa sangka relihiyon.
Nagapadayun man ro ginahimo nga imbestigasyon it kapulisan agud nga sayuron ro matuod nga motibo sa krimen ag pagkatawo it mga suspek para sa madasig nga pagdakop kanda.
