NEWS Analysis–Padayun ro kontrobersiya sa bag-ong tourism campaign nga “Love the Philippines”.
Maskin nga nagsorry eon ro ad agency sa palpak nga audio-visual presentation ag ginbawi eon man it Department of Tourism ro kontrata kanda, indi puwedeng paeampason eon lang ro tanan.
Kinahangean nga maimbestigahan ro makahueuya nga insidente ag maklaruhan eabi eon it publiko ro pinaka-ugat sa ginhimo nga tourism rebranding.
Madumduman nga sambilog si Rep. Joey Salceda sa nakapuna nga may saea sa rebranding ag gintawag pa nana raya nga “trabahong tamad”.
Bagay nga indi dapat matabu sa gobyerno eabi eon kon milyones ro ginagastos sa programa ukon proyekto.
Rason nga ginarekomenda it mamalidha nga magpatigayon it konsultasyon sa mga tourism stakeholders para sa matuod nga tourism rebranding it Pilipinas.
Posibleng maglunsar ro gobyerno it consultative conference para makakolekta it input ag mga panan-awan halin sa stakeholders.
Kumbaga, indi pag solohon ro trabaho eabi eon kon magapalpak.
Kabay nga makaangkon it leksyon ro mga ahensya it gobyerno nga pamatian ro opinyon it mga may kaangtanan sa gina-obra nga pagbag-o.
Pinaagi kara hay mas madaling makahimo it polisiya ag magiging manami ro resulta ag owa it mabutang sa aeang-aeang.
Samtang, nagapati man kita nga eabaw sa pag-angkon it bag-ong slogan ukon itsura it tourism campaign, dapat hay matutukan man ro mga matuod nga pagbag-o sa turismo.
Kinahangean nga ayuson ro mga kakueangan sa serbisyo, para mas mahaeon ro Pilipinas.
