BORACAY, Island — Ginpirmahan eon ro kontrata sa tunga it Top Line Hi Tech and Synergy Corporation ag Aklan provincial government para sa Smart Port Unified Automated Ticketing System para sa Boracay nga ginpatigayon ko adlaw it Martes Pebrero 18, 2025.
Tuyo kara nga mataw-an it komportableng biyahe ro mga turista ag makalikaw sa aberya sa pagbayad it environmental ag terminal fee patabok sa isla it Boracay.
Sa pinaagi it nasambit nga sistema, mapapig-od ro oras nga ginataeana it mga turista sa Cagban ag Caticlan Port sa pag-asikaso it andang pag-eayag patabok sa isla.
Ginpahayag ni Eugene Erik Lim, President ag CEO it Topline company, prayoridad nanda ro seamless transaction it mga dumueoong ag lokal nga turista kon sa siin raya man ro andang naging commitment sa gobyerno probinsyal it Aklan.
Nasayuran nga haeos dekada eon nga ginplanuhan ro moderno nga sistema ag makaron eamang raya natuman rason nga eubus ro kalipay it mga stakeholders bangud nga mapadali eon ro pagbayad it environmental, terminal ag boat fee.
Ginaeauman sa nasambit nga bag-ong sistema ro kasoehayan sa pag-eayag patabok sa isla it mga local ag foreign tourists kapin eon makaron nga nagahilapit ro summer season nga tyempong magabuhos eon man libo-libong mga turista kada adlaw.
