KALIBO, Aklan—Uman nga nagpanindugan si Sangguniang Panlalawigan member Jay Tejada nga suportado nanda ro pagtukod it Boracay Island Development Authority ukon BIDA bill bilang regulatory body ag bukon it government owned and controlled corporation ukon GOCC.
Raya ro anang reaksyon matapos nga aprubahan eon it Kamara sa ikatlo ag ulihing pagbasa ro ginaduso nga laye nga magabilog it BIDA nga hugut nga ginabaeabagan it mga stakeholders ag iba pang grupo sa isla.
Suno kay SP Tejada nga ginaeauman eon nanda ro pag apruba kara it kamara.
Nagaeaum sigon sanda nga magapabor kanda ro bersyon it senado pinaagi sa mga puntos nga andang ginpaabot.
Pilang senador sigon ro andang ginpadaehan it opposition paper.
Samtang, sa pihak suno kana nga gin-aprubahan raya it kamara hay eubus man ro andang pagpasaeamat sa pag apruba ni pangueong Rodrigo Duterte sa extension it termino it Boracay Inter-Agency Task Force ukon BIATF hasta sa hunyo 2022.
Posible sigon nga indi raya matigayon sa idaeum it termino ni Duterte.
Madumduman nga sa House Bill 9826 ukon ro ginaproponer nga BIDA Act, nag abot sa 193 nga mamalidha ro nagpabor samtang pito ro nagkontra ag owa it nag-abstain.
Ro BIDA Bill hay kaibahan sa priority bills nga gusto ni Duterte nga insigidang maaprubahan.
Sa idaeum it nasambit nga proposed bill, ro government-owned and -controlled corporation (GOCC) ro magadumaea, magapa-umwad, magapadaeagan, magapabilin ag maga-rehabilitate sa Boracay Island Development zone kaibahan ro bilog nga Boracay ag mga kaiping nga isla eakip ro Barangay Caticlan.
