Kalibo Aklan ——-Ginatumod makaron it mga opisyal it Barangay ro posible pang gin-agtunan it naging kontrobersiyal nga si “Miss Dolomite” Renalyn Macato matapos nga mag-viral ro anang post sa social media samtang nagakaon sa sangka taeabahan sa banwa it New Washington.
Suno kay Tambak Barangay Captain Lucille Macario it nasambit nga banwa nga paga-imbestigahan nana ro restaurant nga ginkaunan it nasambit nga babaye ag iba pa nana nga mga kaibahan.
Mag-eowas sa New Washington, naispatan man si Macato sa Kalibo Pastrana Park nga nagpabo-oe man it litrato.
Posible sigon imaw nga mapasabat sa pag-eabag sa protocol base sa ginpaguwa nga Executive Order ni Aklan Governor Florencio Moraflores nga ginabawaean nga mag-side trip sa iba pang lugar sa probinsiya ro mga turista halin sa isla it Boracay bangud sa paeag it coronavirus disease 2019 (COVID-19).
Madumduman nga antes pa man ro anang bakasyon sa Boracay, kun sa siin spotted imaw nga nakasuksok it two-piece blue bikini, naging kontrobersiyal eon si Macato ko nagtaliwan nga buean kat maging viral ro anang litrato nga nakasuksok it pueang swimsuit sa Manila Bay White Sand Beach sa Roxas Boulevard.
Oktubre 1 kat buksan ro Boracay sa mga bisita halin sa mga lugar nga sa idaeum it General Community Quarantine.
Kinahangean nga magsunod ro mga raya sa test-before-travel regulation ukon magpakita it negatibong RT-PCR result 48 hasta 72 hours antes ro andang pagbiyahe.
