KALIBO, Aklan—Nagpanindugan si Bayan Muna representative Carlos Isagani Zarate nga bukon it ro kontrobersyal nga Anti-Terrorism Bill ro sabat makaron sa ginapangatubang nga krisis it nasyon tuga it Covid-19 pandemic.
Suno kana, madaeom ro kaungdan it ginaduso nga laye nga sertipikado pa raya ni Pangueong Rodrigo Duterte.
Ginpaathag nga uwa sanda gintaw-an it kahigayunan it Malacañang nga madebatehan ro ginaduso nga House Bill No. 6875 nga nagatuyong amiyendahan ro Human Security Act of 2007.
Bangud kara, makit-an suno kana ro alima it Duterte administration sa tunga it Covid-19 krisis.
Dapat suno kana ro taw-an it prayoridad makaron it gobyerno hay kon paano masolusyunan ro nagapadayon nga pagtinaas it kaso it Covid-19 sa nasyon, ro epekto kara sa ekonomiya, sa mga less fortunate eabi eon ro mga nawad-an it trabaho ag pangabuhian.
Nasayuran nga padayun nga naga-abu ro nagapanawagan nga ibasura ro anti-terrorism bill.
Sa idaeom it proposisyon, pagapenahan ro sin-o man nga magasuhestyon, magatueod, makipagsabwatan ag makipagbahin sa pagplano, training, ag pagdumaea sa sangka terrorist act; kamana man ro magata-o it suporta sa mga terorista ag recruiters it sangka terrorist organization.
Ro sin-o man nga magahimo it act of terrorism, ag ro magproponer it anumang terrorist act ag maga-engganyo it iba nga magpasakop kara hay pagapenahan it 12 anyos nga pagkakulong.
Maging ro mga magabulontaryong magapasakop sa anumang organisasyon, asosasyon ukon grupo it mga indibidwal sa sangka terrorist organization hay paga-imponeran man it 12 anyos nga pagkakulong.
Kaparehong penalidad man ro igaimponer sa mapamatud-ang accessory sa sangka terrorist act.
