KALIBO, Aklan — Patay ro sangka turistang Koreano matapos nga mabagok ro ueo kat mag-dive sa swimming pool samtang nagapaligos kaibahan ro anang manghod nga babaye sa sangka resort sa Station 2 sa isla it Boracay.
Ginkilaea ni PO1 Pedro Maguin it Malay PNP-Boracay Sub-Station ro namatay nga si Chao Jeasok, 29, taga-Korea ag nagabakasyon eamang sa isla.
Base sa inisyal nga imbestigasyon, nagsaeampitan ro magmanghod nga magpaligos sa sueod it Villa Sunset Resort, antes nag-eangoy hay nag-inom anay it sangka boteng beer ro biktima.
Ginpahayag nga nag-dive ro Koreano sa manabaw nga pool nga may kadaeumon nga 4 hasta 5 feet ag tumama ro anang dahi sa sementadong saeog it swimming pool.
Nataeopangdan pa sigon it security guard ro pag-dive it turista, apang makataliwan ro tatlong minuto hay uwa pa raya nakabutwa.
Gin-rescue ag gilayon nga gindaea sa sangka clinic ro dumueoong, apang gindeklarang dead on arrival.
