KALIBO, AKLAN — Nagpanguna sa gihapon ro mga Koreans ag Chinese sa tourist arrivals sa isla it Boracay sa sueod it an-om nga buean it dag-on.
Suno kay Kristoffer Leo Vellete, officer-in-charge it Department of Tourism (DoT)-Boracay sub-office nga raya hay bangud sa pag-angkon it regional ag domestic flights sa Kalibo ag Caticlan airports.
Kapin sa 175,470 sigon ro mga Koreano nga nagbakasyon sa Boracay nga ginsundan it China nga nakalista it 174,064.
Nagpangatlo ro Taiwan nga may 25,067 nga turista.
Nagaabot it 495,436 ro mga foreign tourists nga nagbakasyon sa isla sa katung-anan it Enero hasta it Hunyo.
Ro East Asian region ro may mabahoe nga kontribusyon sa numero it mga turista.
Pila pa sa mga turista hay naghalin sa Southeast Asia kaparehas it Vietnam, Thailand, Cambodia, Laos, Singapore, Brunei, Malaysia, Myanmar ag Indonesia kamana man sa North America nga ginakaeakipan it Mexico, Estados Unidos ag Canada.
Samtang, may mga bisita man sigon halin sa Northern Europe kaparehas it Sweden, Ireland, Finland, United Kingdom, Denmark ag Norway ag mga ginakabig nga emerging markets halin sa Middle East nga mga nasyon.
Nasayuran nga ro tourist arrival umpisa Enero hasta it Hunyo hay nag-abot eon sa 1,107,167 ukon may pagtaas it 13% kumpara sa 982,710 ko nagtaliwan nga 2016 sa kaparehong period.
