KALIBO, Aklan — Ninahan ro ap-at nga pasahero it sangka kotse matapos raya nga magbaliskad sa Ibajay, Aklan.
Ginkilaea ro mga sakay nga sanday Enrique Riego, 46-anyos it Brgy. Aslum, Ibajay, drayber it kotse; Aaron Yves, 20, it Bugtong-Bato, Ibajay; Gj Requillo, 16, it Libtong Estancia; ag Jonathan Dela Cruz, 17, it Poblacion, Ibajay.
Sa interview it Bombo Radyo kay PO2 Jimmy Alcaydo it Ibajay Police Station, ginpahayag kara nga self-accident ro natabo.
Suno pa kay Alcaydo, madasig ro pagmaneho it kotse halin sa Barangay Colong-colong paadto it Poblacion sa nasambitang banwa.
Nawad-an sigon it kontrol sa pagmaneho si Riego kabangdanan agud nga sumunggab ro kotse sa steel railing, bumaliskad ag inapok sa pihak nga linya it karsada.
Insigida man sandang gindaea sa Ibajay District Hospital agud maeapatan it nagakaigong medikasyon.
