KALIBO, Aklan — Nagapangatubang sa kasong reckless imprudence resulting to homicide, multiple serious physical injury and damage to property ro sangka Indian national matapos nga araduhon ro daywang motorsiklo sa Barangay Poblacion, Balete, Aklan.
Nakilaea ro driver/suspek nga si Mandeep Singh Dhaliwal, 39, ag temporaryong naga-istar sa Dulunan Villa, Iloilo City.
Suno kay Police Staff Sergeant Jeric Dadivas it Balete Municipal Police Station, patay eon kat maka-abot sa Aklan Provincial Hospital ro backrider nga si Anselma Traje, 51, matapos nga inapok sa ginasakyan nga motorsiklo nga ginamaneho it anang asawa nga si Jovy Traje, 53, ag parehong residente it Barangay Poblacion, New Washington, Aklan.
Samtang, naninahan man ro mag-ama nga sanday Vicente Recto, 53, ag Jeric Vince Recto, 17, parehong naga-istar sa nasambit nga lugar.
Base sa imbestigasyon it pulisya, nagabiyahe ro dumueuong sa nasambit nga lugar halin sa Iloilo City ag paagto eon kunta sa banwa it Kalibo kat gulpi kara nga binungguan ro motorsiklo it mag-asawa ag inarado it pilang metro.
Angot kara, inapok ro mag-asawa at nagpa-ekis-ekis ro saeakyan hasta nga naagto raya sa pihak nga linya it karsada kun sa siin, nabungguan kara ag inarado ro sambilog pang motorsiklo sakay ro nasambit nga mag-ama.
Dikara eon nagpundo ro saeakyan samtang ro mga naninahan nga biktima hay nakakalhit sa national highway.
Insigida man nga gin-aresto ro dumueuong ag nakakulong eon raya makaron sa lock-up cell it Balete PNP samtang ro mga biktima hay padayun nga ginabueong sa banwa it Kalibo.
