KALIBO, Aklan—Mabahoe ro pagpati ni dating Kalibo sangguniang bayan member Rudy Irenea nga electrical short circuit ro naging rason it pagkasunog it anang cock house ukon kulungan it mga manok bandang alas-9:00 kabi-i sa Brgy. Pusiw, Numancia, Aklan.
Suno kana nga nagakatueog eon sanda kat mabatian ro pagsinggitan it andang mga kaeapitbaeay bangud sa nagakasunog nanda nga cockhouse.
Mabahoe eon suno kana ro kaeayo kat magguwa imaw sa andang baeay.
Apang mabahoe ro anang pasaeamat sa mga kaeapit-baeay nga nagbueuligan agud nga matapna ro kaeayo.
Pag-abot sigon it mga bumbero it Bureau of Fire Protection (BFP)-Numancia hay sigidas pa ro pagdaba-daba it kaeayo.
Madasig nga nagkalhit ro kaeayo bangud nga ro kulungan it manok hay himo eamang sa light materials.
Ginatantiya nga masobra sa P50,000 ro danyos it nag-eontad nga sunog.
Nasayuran nga daywang pangbueang nga manok it dating opisyal ro nasunog ag sangka munga nga nagaeum-eum.
Sa mayad nga swerte hay owa man it naninahan sa insidente.
Samtang, ginpahayag ni FO1 Ariel Villareal it BFP-Numancia nga nagapadayun pa ro andang imbestigasyon sa natabu nga sunog.
Sa pag-usisa sigon nanda sa lugar hay nataeupangdan kara ro mga nagabaeanggangat nga wiring.
Mag-eowas kara, may pailaw sa sueod it kulungan it manok nga naka-konekta sa baeay it nagapanag-iya.
Natumod eon sigon nanda ro ginhalinan, apang owa pa nasayuran kon paalin nga nagkaeayo.
Maskin nga nagdeklara it inisyal nga danyos si Irenea, apang magahimo man sanda it andang kaugalingon nga damage sa sunog.
Samtang, ginlaygayan man nana ro publiko nga maging madahan sa pagsueod it fire prevention month bangud sa grabeng init it tiempo.
