Sangka 15-week-old kitten nga owa it sex organ ro gina-usuyan makaron it taga-alaga ag magatau kana it baeay nga maistaran.
Kat gindaea ro kuring nga si Hope sa Cats Protection rescue center sa Warrington, U.K., ro pageaum it mga staff raya hay sangka babaye.
Apang sa pag-usisa it mga veterinarian kay Hope, ginkakibot nga bukon raya it babaye ukon eaeaki bangud nga owa raya it sex organ.
Suno kay Fiona Brockbank, senior veterinary officer aid it Cats Protection, owa it sex organ si Hope bangud sa ginatawag nga agenesis ukon ro failure it organ nga magdebelop samtang sa tiyan pa.
Ordinary eon sa mga veterinarian nga makakita it hermaphrodite cats ukon kuring nga may daywang sex organ apang sangka tumaeagsahon nga kondisyon ro naexperiensiyahan ni Hope bangud nga owa raya it maskin sambilog nga sex organ.
Sa sobrang pagkabihira it nasambit nga kondisyon, owa pa it scientific term para kara.
Agud nga makasigurado, nagpaidaeum sa sangka procedure si Hope agud nga usisaon ro anang anatomy.
Bangud kara, nakumpirma nanda nga internally ag externally, owa gid it sex organ ro kuring.
Sa espesyal nga kondisyon ni Hope, kinahangean nga i-monitor anay it mga veterinarian kun maayos baea ro pag-ihi ag paghigku kara antes nga ipa-ampon sa magiging bag-o nana nga pamilya.
