KALIBO, Aklan — Naka-impound sa taeatapan it Highway Patrol Group ukon HPG-Aklan ro sangka puti nga Montero nga ginamaneho it sangka owa ginpangaeanan nga engineer bangud sa kawad-an it nagakaigo nga dokumento kat maispatan it mga nagapatrolya nga operatiba sa banwa it Kalibo, Biyernes it agahon.
Suno kay P/Staff Sgt. Rainier Bartolome it HPG-Aklan nga presenteng gina-usisa sa crime laboratory ro saeakyan agud nga matumod kon natabing ro chassis ag engine number kara.
Gina-beripika man sigon nanda ro record kara sa Land Transportation Office ukon LTO.
Nagduda sigon sanda ag gin-eagas ro saeakyan hasta sa may Vizcarra Subdivision bangud sa gina-angkon nga temporary plate number nga ro nakabutang hay conduction number nga owa nagakasinanto sa anang sticker nga nakabutang sa wind shield .
Sa oras nga maka-presentar it nagakaigo nga papeles hay igabalik sa engineer ro nasambit nga saeakyan .
Samtang, suno sa Highway Patrol Group ukon HPG, kasong Anti-Fencing ro paga-atubangon engkaso nga may ginabuytan nga saeakyang nga karnap.
Posible man nga maeakot sa kasong karnaping ro sin-u man nga matukiban nga may posesyon it mga saeakyang karnap.
Pila sa mga tips halin sa HPG agud nga masigurong ro inyong mga saeakyan hay bukon it karnap.
Una, ipa-macro etching ro saeakyan nga pagabak-eon eabi eon kun raya hay second hand.
Likawan nga magbakae it mga saeakyan online kun bukon it pamilyar sa makarondaya nga transaksiyon.
Boe-on ro bilog nga impormasyon it ginbak-ean ag maskin ro pagabak-eon nga saeakyan.
Indi anay magbayad ukon magpaguwa it kwarta hasta nga owa nausisa ro record it saeakyan.
Mas mayad kon magpa-double check sa LTO it record it saeakyang pagabak-eon .
Engkaso nga makabakae it karnap nga saeakyan, indi maging oportunista ag i-turn over raya sa HPG antes pa man nga maunahan it mga otoridad ag mapasakaan it nagakaigo nga kaso.
