KALIBO, Aklan—Ginapahauman eon makaron it Malay Tourism Office ro LaBoracay nga may mga regulated activities nga ginaeauman man nga pagadagsaon it maabong turista ag bakasyunista.
Suno kay Malay Tourism Officer Mr. Felix Delos Santos, ro nasambit nga event hay bukon it kaparehas ko mga nagtaliwan nga dinag-on bangud nga halin kat temporaryong ginpasarado ro isla it Boracay para sa rehabilitasyon ko 2018 hay ro tanan nga aktibidad nga mga nagbalik hay nakapokus sa environment concern rason nga ro LaBoracay makaron nga dag-on maskin may mga beach party una gihapon ro mga aktibidad para sa pag-amlig sa environment.
Ro LaBoracay hay masami nga ginapatigayon kada Mayo 1 rason nga ginaeauman eon nanda ro influx it libo-libong mga turista kapin eon makaron nga naeksperyensyahan it nasyon ro tuman kainit nga panyempo daea it El Niño phenomenon.
Sa makaron suno kay Mr. Delos Santos hay nagapanguna gihapon sa listahan it tourist arrival sa Boracay ro mga Korean tourist, ginasundan it Chinese, European ag iba pang lahi.
Sa pihak kara, ginkumpirma ni Delos Santos nga naabot ro masobra sa 50,000 tourist arrival sa tyempo it Semana Santa.
