LEZO, Aklan — Nagapangatubang sa reklamong pag-eabag sa Republic Act 9165 ukon Comprehensive Dangerous Drugs Act of 2002 ro sangka laborer matapos nga maaresto sa ginkasa nga drug buy-bust operation sa andang baeay sa Barangay Ibao, Lezo, agahon it Huwebes, Pebrero 12, 2026.
Ginkilaea ro suspek nga si alyas Mon-Mon sa legal nga edad ag residente it nasambit nga lugar.
Suno kay P/Capt. Donnie Magbanua, hepe it Lezo Municipal Police Station nga nabak-ean ro suspek it daywang plastic sachet it ginadudahan nga shabu kabaylo it P1,000 nga buy-bust money.
Sa pagrekisa it mga otoridad, nabuoe sa posisyon ag kontrol it suspek ro dugang nga limang sachet it suspected shabu.
Haeos limang buean sigon nga ginpaidaeaum sa surveillance ro suspek antes nga ginkasa ro operasyon nga naging madinaeag-on sa bulig it Provincial Drug Enforcement Unit it Aklan Police Provincial Office.
Nagapabilin sa kostudiya it kapulisan ro suspek para sa nagakaigo nga disposisyon samtang ro mga narekober nga ebidensiya hay ginpadaea sa crime laboratory.
