Posibleng manabat ro mga legal counsel ni dating Bamban, Tarlac Mayor Alice Guo kung hipatunayang nakaguwa raya it Pilipinas kat ginhaon ro anang counter-affidavit sa Commission on Elections. Suno kay Comelec Chairman George Erwin Garcia, kung matuod nga nagpanaw it nasyon si Guo nga uwa it anumang intensiyon nga bumalik, haman pa sigon it nagpangayo ro anang legal counsel it extension halin sa poll body para sa pagsumite it anang counter-affidavit.
Raya sigon hay contemptuous o insulto pareho sa korte ag sa komisyon. Naga pati man si Garcia nga may kakayahan ro mga abogado ni Guo nga magsumite it counter-affidavit it andang kliyente para indi maabutan ro gintaeana nga deadline kahapon, Setyembre 3 kung gustuhon nanda.
Sa makaron, uwa pa nabaton it Comelec ro mismong dokumento halin sa kampo ni Guo. Ginhambae man ni Chairman Garcia nga indi eon sanda magtao pa it panibag-ong extension para kay Guo para maghaon it anang counter-affidavit kaangot sa misrepresentation complaint kuntra kana sa Comelec nga naga-ugat sa pagpinusong kara sa anang kandidatura kat magdaeagan bilang alkalde it Bamban ko 2022 elections.
Suno pa sa opisyal, gintaw-an eon nanda it tyansa si Guo nga magtao it anang sabat sa komisyon ag nakadepende eon sa Comelec Law Department ro pag-draft it pinal nga rekomendasyon ag sinigurado man sa publiko nga insigidang aksyunan it Comelec en banc anuman ro mabaton nandang desisyon.
