LEZO, Aklan—Padayon nga ginatumod it Lezo Municipal Police Station ro identity it multicab driver nga ginsunggaban it motoristang nagpatigayon it drag race sa diversion road nga sakop it Brgy. Carugdog, Lezo ko Huwebes it gabie, Nobyembre 14.
Suno kay P/Lt. Zoila Tumlos-Hilario, Deputy Chief Of Police it Lezo PNP Station, posible suno kana nga bukon it taga-iya ro nagamanehar it behikulo ag gusto nanda masayuran kon aware baea raya nga ginsunggaban imaw it motorsiklo bangud nga base sa cctv footage nga andang nabuoe hay uwa ginbalikda it driver ro biktima maskin nga magtawag eon lang it emergency responders.
Haeos blured sigon ro andang mga nabuoe nga kopya it cctv footage rason nga hasta sa makaron hay uwa gihapon nanda masayuran ro plate number it nasambit nga behikulo.
Ginpahayag dugang ni PLt. Hilario nga ginatan-awn pa nanda kon may saeabton ro multicab driver matapos nga raya ro ginsunggaban it nagakarera nga motorsiklo.
Sa pihak kara, hugot man ro padumdom it pulisya sa mga pamatan-on nga haeongan ro andang kaugalingon ag kon makabig nga sports para kanda ro drag race, may nagakaigong lugar para dikara ag dapat nakasuksok it protective gear agud nga maprotektahan ro andang kaugalingon sa anumang disgrasya.
Madumduman nga binawian it hueam nga kinabuhi sa nasambit nga lugar ro 15-anyos nga binatilyo matapos nga nakaangkon it fatal nga lastro sa uyahon tuga it nasambit nga aksidente.
