KALIBO, Aklan—Gin-aprubahan sa ikaywa hasta sa ikatlong pagbasa sa ginpatigayon nga regular session it Sangguniang Bayan it Banga ro P250 milyon pesos proposed loan it lokal nga gobyerno para sigon sa construction it Banga Public Market.
Suno kay Banga sangguniang bayan member Jocel Rata, uwa imaw naga-kwestyon sa katuyuan it proyekto bangud nga para man raya sa kamaeayran it banwa apang, gusto eamang sigon nana it kaklaruhan bangud sa mabahoe nga kantidad ag ro pagbayad kara nga nagaabot sa 15 anyos.
Uwa sigon it problema sa pag-utang apang paano eon kon sa pagbinaeayran.
Ginkwestyon kara ro LGU kon nakahimo it maayos nga feasibility studies sa ginaduso nga proyekto.
Ginpahayag dugang ni Rata nga kinahang-ean nga balansehon ro tanan bangud nga pwede man nga mahimo nga by phase ro pagpaobra it merkado nga inde kinahang-ean ro gulpihang pag-utang it kapin sa P250 milyon pesos.
Mag-eowas kara, kinahang-ean man nga ikonsidera ro mga negosyante ag vendors nga naga-okupa sa merkado kon masarangan nanda nga bayaran ro andang pwesto engkaso gidman nga matuman ro proyekto.
Rason nga hugot imaw nga nagapamaeabag sa ginpatigayon nga deliberasyon bangud nga ginadumdom nana ro magiging kahinantnan it mga negosyante, vendors, pumueoyo ag maging ro mga bumaeakae.
